තොරතුරුවලට ප්‍රවේශවීමට ඇති අයිතිවාසිකම සම්බන්ධයෙන් විධිවිධාන සැලසීම සඳහා තොරතුරු ලබා ගැනීම සඳහා වන ක්‍රියාපටිපාටිය නිශ්චිතව දැක්වීම සහ ඊට සම්බන්ධ හෝ ආනුෂංගික කාරණා සඳහා විධිවිධාන සැලසීම සඳහා ද වූ පනත වන ‘2016 අංක 12’ දරන ‘තොරතුරු දැන ගැනීමේ අයිතිවාසිකම පිළිබඳ පනත’ සම්මත කිරීම පසුගිය අගෝස්තු 04 වන දින සිදු විය. මීට සමගාමිව ශ්‍රී ලංකා පුවත්පත් ආයතනය විසින් දැනුවත් කිරීමේ වැඩමුළු රට පුරා ක්‍රියාත්මක කිරීමට තීරණය කර ඇත.
ඒ අනුව තරුණ තරුණියන් මේ සදහා උනන්දු කිරීම අරමුණු කරගනිමින් 2017, ජුනි මස 15 වන දින ශාක්‍යා හෝටලයේදී ගම්පහ දිස්ත්‍රික්කයේ තරුණ තරුණියන් හට තොරතුරු දැනගැනීමේ පනත පිළිබද හා එහි ක්‍රියාත්මක වීම පිළිබද හරවත් දේශන මාලාවක් සිදුකරන ලදී. මෙම දැනුවත් කිරීම සිදුකරන ලද්දේ කමල් ලියනාරච්චි මහතා හා නීතිඥ සහ මාධ්‍යවේදිනි රදිකා ගුණරත්න මෙනෙවිය විසිනි.