එන්. ලෝකතයාලන්
යාපනය ශික්ෂණ රෝහලට පරිත්‍යාග කෙරෙන රුධිරයෙන් කොටසක් පෞද්ගලික රෝහල්වලට ලබාදීම පිළිබඳව තොරතුරු දැනගැනීමේ පනත හරහා සහතික කොට ඇත. මෙම කාර්යය, සෞඛ්‍ය අමාත්‍යාංශයේ අනුමැතියට යටත්ව සිදු කෙරන බව එම තොරතුරු වැඩිදුරටත් හෙළි කරයි.
යාපනය අර්ධද්වීපයේ පෞද්ගලික රෝහල් 17ක් ක්‍රියාත්මක වන අතර ඉන් රෝහල් 8ක ශල්‍යාගාර ඇත. මෙම පෞද්ගලික රෝහල්වල ශල්‍යාගාර තුළ සිදුකරන සැත්කම්වලදී අවශ්‍ය රුධිරය රජයේ රෝහල්වල ලේ බැංකු වලින් සපයනු ලැබේ.
යාපනය ශික්ෂණ රෝහලේ අධ්‍යක්ෂ ආර්. සත්‍යමූර්ති විසින් සපයන ලද තොරතුරුවලට අනුව යාපනය ශික්ෂණ රෝහලේ රුධිර බැංකුවට 2022 වසරේ රුධිර පයින්ට් 8596ක් ලැබී ඇත. මෙයින් රුධිර පයින්ට් 807ක් පෞද්ගලික රෝහල්වලට ලබා දී ඇත. එලෙසම 2023 වසරේදී ලේ බැංකුවට රුධිර පයින්ට් 9043ක් ලැබී ඇති අතර ඉන් රුධිර පයින්ට් 875ක් පෞද්ගලික රෝහල්වලට ලබාදී තිබේ.
2024 ජුනි 30 වැනි දින දක්වා වූ අර්ධ වර්ෂ කාලය තුළ රෝහලට රුධිර පයින්ට් 4113ක් ලැබී ඇති අතර, ඉන් රුධිර පයින්ට් 441ක් පෞද්ගලික රෝහල් වෙත ලබා දී ඇත.
2022, 2023 වර්ෂ වලදී සහ 2024 ජුනි දක්වා කාලය තුළ පෞද්ගලික රෝහල්වලට රුධිර පයින්ට් 2023 ක් සපයා ඇත. ඉන් රුධිර පයින්ට් 1507ක් ලබා දී ඇත්තේ එක පෞද්ගලික රෝහලකට පමණි. එසේම තවත් පෞද්ගලික රෝහලකට තවත් රුධිර පයින්ට් 209ක් ලබාදී ඇති බව තොරතුරු දැනගැනීමේ පනත යටතේ දැනගන්නට ලැබිණි.